Месяца февруария в 3-й день
СЛУЖБА
святому благоверному великому князю Святославу III Всеволодовичу,
нареченному во святом Крещении Гавриилу,
Юрьевскому чудотворцу
НА ВЕЛИЦЕЙ ВЕЧЕРНИ:
Блажен муж: 1-й антифон
На Господи, воззвах: Стихира на 8, глас 8. Подобен: О, преславнаго чудесе:
Житию твоему Боголепно текущу, / жизнодавцу Христу, Солнцу праведному, / привился еси, блаженне, / иже и общника тя содея трапезы Своея / и царствия Своего наследника сотвори, / яко змия льстиваго умертвил еси, / лютыя его козни до конца посрамив. (дважды)
Приидите согласно вернии, / память совершим Святослава блаженнаго, / благочестия столпа недвижима, / на камени веры основанного твердо / искушений и бед волненьми не гиблема, / Христу бо ныне жив предстоит, / и от смерти нас избавляет / дерзновенными своими молитвами.
Воплощшагося Бога Слова нашего, / живоносным стопам последовал еси, / и Боговидною тишиною нрава своего / одеяние духовное светло уяснил еси, / темже от славы благочестно во славу пришел еси, / сего ради песньми тя почитаем священными.
Ины стихиры, глас 2. Подобен: Киими похвальными:
Киими благохвальными венцы / увязем пречуднаго Святослава, / Троицы угодника, / Церкви нашея красное благолепие, / в чудесех великоименитаго, / имиже благочестие утверждается, / дивный бо во святых Своих Господь в нем предивен бысть, / без числа имеяй велию милость.
Кия дерзновенныя пения / восписуем ти, чудотворче славне, / отечества нашего Богодарованный защитниче, / крест бо Христов, всечестное оружие, на рамо твое восприем, / сим победил еси болгар нечестивых лютыя полчища. / Ныне же Христу на небесех предстоя, / мир Российстей земле испроси / и душам нашим велию милость.
Кия песенныя доброты, / угодничне тебе принесем, / непорочныя веры неисчерпаемое почерпшу питие / и победительно течение совершившему, / от сущих бо зде к вечным преставился еси жилищем, / и от вседержителяныя руки почести венец прием, / просиши очищения душам нашим / и велия милости.
Киими духовными песньми / ублажим чудотворца Христова, / светло подвизавшагося и блаженную кончину приявша / дивнаго во князех, Святослава Боговенчаннаго, / земли нашея похвалу и удобрение, / победителя предобляго зловерных поган, / ихже шатания Христос низложи / имеяй велию милость.
Слава, глас 6:
Во светлый твой праздник сошедшееся верни, / торжество твое, княже всеблагоговейно совершаем днесь, / и мысленных источников почерпывающе реки / от честных твоих и многоцелебных мощей, / любовию вси тя красно песнословим.
И ныне, глас той же. Богородичен: Кто тебе не ублажит:
Вход. Прокимен дне. И чтения три.
Притчей чтение (главы 10, 3, 8)
Память праведнаго с похвалами, / и благословение Господне на главе его. / Блажен человек, иже обрете премудрость, и смертен, иже уведе разум. / Лучше бо сию куповати, нежели злата и сребра сокровища. / Честнейшая же есть камений многоценных, все же честное недостойно ея есть. / Долгота бо дней и лета живота в деснице ея, / в шуйце же ея богатство и слава. / От уст ея исходит правда, / закон же и милость на языце носит. / Послушайте убо мене, о чада, честная бо реку, / и блажен человек, иже пути моя сохранит. / Исходи бо мои – исходи живота, / и уготовляется хотение от Господа. / Сего ради молю вас и предлагаю мой глас сыновом человеческим: / яко аз, премудрость, / устроих совет, / и разум и смысл аз призвах. / Мой совет и утверждение, / мой разум, моя же крепость. / Аз мене любящит люблю, ищущии же мене обрящут благодать. / Разумейте убо, незлобивии, коварство,/ ненаказаннии же, прилагайте сердца. / Послушайте мене и паки, честная бо реку, / и отверзу от устен правая, яко истине поучится гортань мой, / мерзки же предо мною устны лживыя. / С правдою вси глаголы уст моих, / ничтоже в них стропотно, ниже развращенно. / Вся права суть разумевающим и проста обретающим разум. Научу бо вас истине, / да будет о Господе надежда ваша, / и исполнитеся Духа.
Притчей чтение (главы 10 и 11)
Уста праведнаго каплют премудрость, / язык же неправеднаго погибнет. / Устне мужей праведных каплют благодати, / уста же нечестивых развращаются. / Мерила льстивая мерзость пред Господем, / вес же праведный приятен Ему. / Идеже аще внидет досаждение, тамо и безчестие, уста же смиренных поучаются премудрости. / Совершение правых наставит их и поползновение отрицающихся упасет их. / Не пользуют имения в день ярости, правда же избавит от смерти. / Умер праведный, остави раскаяние, / наручна же бывает и посмеятельна нечестивых пагуба. / Правда непорочнаго исправляет пути, в нечестие же падает неправда. / Правда мужей правых избавит их, безсоветием же пленяются беззаконнии. / Скончавшуся мужу праведну, не погибнет надежда, / похвала же нечестивых погибнет. / Праведник от лова убегнет, вместо же его предается нечестивый. / Во устех нечестивых сеть гражданом, чувство же праведных благоспешное. / Во благих праведных исправится град, и в погибели нечестивых радование. / Во благословении правых возвысится град, усты же нечестивых раскопается. / Ругается гражданом лишенный разума, / муж же мудрый безмолвие водит.
Премудрости Соломони чтение (глава 4)
Праведник же аще постигнет скончатися, в покои будет. /Старость бо честна не многолетна, / ниже в числе лет изчитается, / седина же есть мудрость человеком, / и возраст старости житие нескверно. / Благоугоден Богови быв, возлюблен бысть,/ и живый посреде грешных преставлен бысть./ Восхищен бысть, да не злоба изменит разума его. / Рачение бо злобы помрачает добрая, / и парение похоти пременяет ум незлобив. / Скончався вмале исполни лета долга, / угодна бо Господеви душа его, / сего ради потщася от среды лукавствия. / Людие же видевше и не разумевше, / ниже положше в помышлении таковое, / яко благодать и милость в преподобных Его / и посещение во избранных Его.
На литии стихиры, глас 6. Подобен: Тридневен:
Благоверне княже Свяославе, / жития твоего доброта ангелов веселит, / и чудес благодати демонов ужасают, / Христа бо пособствующа стяжал еси. // Его же моли о поющих тя.
Благоверне княже Свяославе, / на небеси обретаеши мзду трудов твоих, / и демонсия разоряеши полчища / и упраздняеши твоими молитвами. / даруя нам мир и велию милость.
Благоверне княже Свяославе, / чистая твоя душа, / добродетелей блистающи светлостьми, / озаряет приходящих к тебе верою / и душам исцеления точит. / Темже Христа моли / даровати нам мир и велию милость.
Слава, глас тойже:
Благоверне княже Святославе, / Священным поучаяся словесем, / страсти греховныя от души отгнал еси, / и Духа Всесвятаго был еси обиталище, / темже и к Божественней жизни преставился еси, досточудне..
И ныне, Богородичен: Творец и Избавитель мой:
Не отрини, Пренепорочная, / молитвы и воздыхания людей Твоих, / в скорбех, болезнех и нуждах / к Тебе присно притекающих.
На стиховне стихиры, глас 2. Подобен: Доме Евфратов:
Храмина честная Святыя Троицы явился еси, / преблаженне княже Гаврииле, / плоть бо свою от страстей предочистив, / и ризою смирения украсившеся светлою / яко достойне Тоя жилище.
Стих: Возвеселится праведник о Господе / и уповает на Него.
Приидите, восхвалим досточуднаго Гавриила ангелов собеседника / и Божией наследника славы, верных предградие, световиднаго Церкви светильника, / юже зарями добродетелей своих честно просвещает, / и неустанно молится о хвалящих его.
Стих: Блажен муж, бояйся Господа, / в заповедех Его восхощет зело.
Мятежнаго жития сего мужески претерпев болезни и труды, / к неболезненней жизни притекл еси, княже Гавриилею / Тем же днесь Христова Церковь, / празднующи священную твою память, / Божественне веселится.
Слава, глас 8:
Согласно сошедшееся, приидите верни, / христоименитаго князя восхвалим, / просвещеннаго светом Безначальнаго Света / и благодатию Единосущныя Троицы, / яко истинно паче солнечных луч просвещает вся, / тьму греховную отгоняюще страстей.
И ныне, Богородичен: Безневестная Дево:
На благословение хлебов тропарь святаго (дважды)
и Богородице Дево: (единожды)
Тропарь святаго, глас 5-й
Славу земнаго княжения,/ Богомудре Святославе,/ оросил еси незлобием и кротостию,/ тем же и Бог тя прослави,/ чудесы во утешение скорбящим,/ целиши бо с верою притекающих к раце мощей твоих./ Сего ради молим тя:/ проси у Христа Господа/ от всяких бед избавление/ и стяжание нам Царствия Небеснаго.
НА УТРЕНИ
На Бог Господь: тропарь святаго (дважды). Слава и ныне. Богородицен.
По 1-м стихословии седален, глас 8. Подобен: Премудрость и Слово:
Твердостию разума простираяся ко Христу, / воздержания богатством украсился еси, / и тяжелоносная плоти отвергая, / гордыню попрал еси, преблаженне княже Святославе. / Моли Христа Бога / грехов оставление даровати / любовию чтущим память твою.
Слава, и ныне, Богордичен:
Образ Твой, Владычице Всепречистая, / воистину многоценное сокровище показася, / имже обогатихомся вернии, / любовию лобызающее сей, / поклоняемся Первообразному.
По 2-м стихословии седален, глас 3. Подобен: Божественная вера:
На высоце седалище всед владычествия земнаго, / но твоими молитвами и Горнее Царство восприял еси, / и ныне на небеси со Христом почиваеши: / зде же даеши исцеления / приходящим к тебе с верою.
Слава, и ныне, Богородичен:
Архангельский глас Ти поем, Богородице Дево: / радуйся, Благодатная, яко Христа родила еси, Спаса миру. / Егоже непрестанно моли со всеми святыми / спасти град Твой и люди, на Тя уповающия.
Величание:
Величаем тя, / святый благоверный княже Святославе, / и чтим святую память твою, / ты бо молиши о нас / Христа Бога нашего.
Псалом избранный:
1. Блажен муж, бояйся Господа. 2. В заповедех Его восхощет зело. 1. Слава и богатство в дому его. И правда его пребывает в век века. 1. В память вечную будет праведник. 2. Праведник яко финикс процветет, яко кедр, иже в Ливане, умножится. 1. Возвеселится праведник о Господе, и уповает на Него. Се устнам моим не возбраню, Господи. 1. Ты разумел еси правду мою и истину мою. 2. Свет возсия праведнику, и правым сердцем веселие. 1. Род правых благословится. 2. Славою и честию венчал еси его. 1. Яко Ты благословиши праведника, Господи. 2. Яко оружием благоволения венчал еси нас.
Слава и ныне: Аллилуиа, трижды.
По полиелеи седален, глас 4. Подобен: Источник исцелений:
Источник исцелений храм твой Божественный показася днесь, / Благоверный княже Святославе, / и рака всечестная цельбоносных мощей / демонския низлагает ополчения, / и яко молния вселенную просвещает чудесы.
Слава и ныне, Богородичен:
Огнезрачных чинов высшую / и Небес пространнейшую, / Матерь Деву величающи воистину / иблагочестно поклоняющися честным иконам Ея / Церковь утверждается / и мысленные пленяет ратники.
Степенна, 1-й антифон 4-го гласа. Прокимен, глас 4:
Праведник, яко финикс процветет / и яко кедр, иже в Ливане, умножится.
Стих: Насаждени в дому Господни во дворех Бога нашего процветут.
Евангелие от Луки, зачало 35.
По 50-м псалме стихира, глас 6:
Приидите, людие славнаго града Юрьева, / в церкви Бога нашего купно станем, / и в веселии обтецем священный гроб, / живоноснаго сокровища честное хранило. / Исцеления неоскудно точащее взывающим: / радуйся, Благоверный княже Святославе, / града нашего светлая красото, / земли Российския похвало и утверждение.
Канон Богородице со ирмомом на 6 и святаго на 8, глас 2.
Песнь 1
Ирмос: Во глубине постла иногда / фараонитское всевоинство / преоруженная сила, / воплощшееся же Слово всезлобный грех потребило есть: / препрославленный Господь славно бо прославися.
Услыши, Господи, гласы рабов Твоих, / ныне вопиющих к Тебе неотступно, / и даруй усердие нам, оскверненным, / чествовати угодника Твоего светлость жития. рождением твоим возвеселил еси.
Добродетельми измлада исполнився, святе, / яко нива плодоносящая, / обилие принесл еси плодов / о Господе присноживота.
Припадаем к щедротам Твоим, Христе,/ помилуй нас, во прах осуждением поверженных, / и возстави мольбами угодника Твоего.
Богородичен: Всеблагаго Бога Благая Мати, / призри милостивым Твоим оком на молитвы раб Твоих / и даруй нам сердец сокрушение, / целомудрие помыслов и трезвение душ.
Песнь 3
Ирмос: На камени мя веры утвердив, / расширил еси уста моя на враги моя, / возвесели бо ся дух мой, внегда пети: / несть свят, якоже Бог наш, /и несть праведен, паче Тебе, Господи.
Ум предочистив слезною молитвою, / святыню Господню, яко свет, возлюбил еси, / и не осквернил еси пред Господем душу свою / срамными деяниями лукаваго.
Возлюбил еси покаяния спасительнаго сладость / и не усладился еси грехом, / и не предстал еси рабом безблагодарным / пред Лице Владыки Христа.
Притецем ныне к благоутробному Богу / и от сердца возопиим: слава Тебе, нас ради распятие претерпевшему, / избавляющему нас от греховных уз.
Богородичен: Изглади рукописания грех наших, Богоневесто, / утиши бурю и смятение страстей / и излей врачевство, / исцеляющее язвы неисцельныя.
Седален, глас 4. Подобен: Скоро предвари:
Измлада Творцу твоему освятился еси, княже всемудре Святославе, / на камени умнем душевныя утверждая стопы, / безбожия мрачное запинаеши безумие, / во веки спасая превозносящия память твою.
Слава, и ныне, Богородичен:
Безневестная Невесто, / Чистая и нескверная Мати Христа Бога, / оскверненных плотскими прегрешеньми / очисти молитв Твоих водами Божественными, / пдающи нам мир и велию милость.
Песнь 4
Ирмос: Пришел еси от Девы не ходатай ни ангел, / но Сам Господи, воплощься, / и спасл еси всего мя, человека, / тем зову Ти: слава силе Твоей, Господи.
Храм Святаго Духа соделал еси плоть свою, княже Святославе, / и яко царское сокровище соблюл еси сию, / жития чистотою душевредныя похоти победив.
Земная и мимоходящая яко уметы вменив, / душепагубный покой возненавидев, / лишения подъял еси / и гордости совлекшись, облеклся еси во смирение.
Отец тя ублажает, / Сын с любовию объемлет, / и Дух Святый животворит / от святаго твоего телесе, Богоблаженне.
Богородичен: Дево Владычице Богородице, Спаса миру во чреве Твоем носившая, / на Тя всю надежду возлагаем, / на Тя уповаем, высшая всех небесных сил.
Песнь 5
Ирмос: Просвещение во тьме лежащих, / спасение отчаянных, Христе, Спасе мой, / к Тебе утреннюю, Царю мира, / просвети мя осиянием Твоим, / инаго бо разве Тебе Бога не знаю.
Прииди, возлюбленный учениче, / потрудивыйся во Имя Мое /внити потщися в чертог, уготованный званным, / тако взывает к тебе Христос, Благоверне кнгяже.
Райския днесь врата отверзаются, / вселяешися бо во обители света, / и покоишися от трудов твоих, / и вкушаеши блаженство / Трапезы Господни неиждиваемыя.
Божественным словесем просветил еси, / яже слаще меда и сота устнам Христовых рабов.
Богородичен: Управи живот наш, Владычице, и окорми к немятежному пристанищу, / сохраняя нас всесильными молитвами Твоими.
Песнь 6
Ирмос: В бездне греховней валяяся, / неизследную милосердия Твоего призываю бездну: / от тли, Боже, меня возведи.
Высоту имея жития, славнее, / образ смиренный помышления стяжал еси, / темже Христу уподобльшеся, / ныне царствуеши с Ним во славе.
С радостию грядеши, Святославе, во сретение Господне, / прославляеши и благословляеши Христа / и сопричастник бываеши праведных, / от века Ему благоугодивших.
Благое иго Христово неленостно нося, / очистился еси от всякия скверны / и со дерзновением в дом свой приял еси Царя Славы, / Господа нашего Иисуса Христа.
Богородичен: Даруй нам, Пречистая, оставление грехопадений, / букди нам прибежище и покров и путеводительница, / препровождающая нас в вечную жизнь.
Кондак, глас 3. Подобен: Дева днесь:
Града Юрьева теплейший заступниче, / земли Владимирския покрове, / Благоверный княже Святославе, / избави нас душетленных страстей / и спаси твоими молитвами.
Икос:
Любовию Божественною окриляем, чудотворче всеславне, / яко орел воспарил еси горняя, / и град обительный утвердил еси / верху горы отеческия веры, / его же бежат воеводы подземных сил, / и безбожные отражаются советы.
Песнь 7
Ирмос: Богопротивное веление беззаконнующего мучителя / высок пламень вознесло есть. / Христос же простре Богочестивым отроком росу духовную, / Сый благословен и препрославлен.
Сердце твое, угодниче, сокрушением добрая бысть земля, / и Духа благодать орошает его водою живоносною / и благая пожинает рукояти.
Ум твой бысть благодати водоточное облако, / души смертных напояющее обильно, / и возращающее плоды прекрасные / и крины райскаго прозябения.
Просветил еси очи сердца твоего, блаженне, / и яко в зерцале, выну в себе Господа зриши, / избавляяся от страстей лукавых / и суетных стремлений.
Богородичен: Не престай молитися о недостойных рабех Твоих, Владычице, / во еже избавитися нам от всякия козни вражия / и неуязвленными соблюстися.
Песнь 8
Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющая / благословите, вся дела Господня, Господа.
Умилосердися над нами, праведниче Божий, / отверзи наших мыслей суетное обращение / и просвети ослепление очей, / да узрим путь Христов, /им же безбедно шествовал еси.
Отринул еси всякое человеконадеяние, / на единаго Бога упование возложив, / был еси яко древо, насажденное при исходищих вод, / доброплодием преукрашенное.
Егда вострепещут судимых сонмы, / и во страсе предстанут обнаженными, / и уста премудрых звградятся, / тогда не остави нас, заступниче, ходатайством твоим.
Богородичен: Даже до конца молитвами Твоими / нас не осужденных сохраняй, Богородице, / да спасени Тобою, / величаем безмерное благоутробие Твое.
Песнь 9
Ирмос: Безначальна Родителя Сын, Бог и Господь, / воплощся от Девы, нам явися, омраченная просветити, / собрати расточенная. / Тем Всепетую Богородицу величаем.
Страхом Божиим выну распаляяся, / душу согрел еси молитв твоих Божественным огнем, / теми же и помышлений наших / греховныя попали терния и волчцы.
Укрепи мя твоими молитвами, угодниче Христов, / заглади вины моя, многосогрешившаго, / уцеломудри чувства, / и научи непоползновенно держатися царскаго пути.
Славословим Отца, сотворшаго нас, / Сына, спасшаго нас Крестом Своим / и Духа Святаго Утешителя – / всехвальную и непостижимую Троицу, / облекающую в нетление праведных телеса.
Богородичен: В час исхода моего не остави мя, / Владычице моя, / но ускори на помощь мне, / и исхити мя из горькаго мучительства бесов.
Светилен, глас 3. Подобен: Плотию уснув:
Благодатию Трисолнечнаго озарився Божества, / премудре княже Святославе, / верно память твою чтущия просвети, / и от тьмы греховныя молитвами твоими избави.
Слава, и ныне, Богородичен:
Храм Неизреченнаго Света была еси, Всепетая Дево, / во утробе Твоей носившая Просвещающаго мира концы. / И ныне Света причастники и нас сотвори, вопиющих: / Слава, Владычице, всемощней силе Твоей.
На хвалитех стихиры на 4, глас 4.Подобен: Дал еси знамение:
Измлада Господень служитель быв мудре, / до конца сохранил еси повеления спасительная / и настоящая сведый житейских вещей, сия презрев / неуклонно шествовал еси путь спасения: / имиже Ангелов сожитель явился еси / и молитвенник о нас пресветел.
Искушений житейских преходя реку, / твоея души соблюл еси Боговидное, славне, / и ныне наших тлетворное играние страстей / молитвами покори твоими / и благохвалити устрой священное твое торжество, всеблаженне.
Не омочився грехами, / преплыл еси бурю многоболезненную жития, / и в небурная пристанища достигл еси, / темже и во глубине ныряющая страстей / ко пристанищу тиху яве безстрастия призови, / Святославе блаженнее, преподобне и праведне.
Слава, глас 8:
От святыя ветви великаго Святослава, / яко благоуханный крин прозябл еси, / преподобне княже Димитрие. / Отеческаго вожделев Богоугоднаго жития, / всеусердно потекл еси того исправления, / и Христу любовию совокупился еси, / от негоже, сродниче, быв украшен уневещения порфирою нетленною.
И ныне, Богородичен:
Владычице, приими молитвы раб Твоих / и избави нас / от всякия нужды и печали.
НА ЛИТУРГИИ
Блаженны от канона, песня 3-я и 6-я.
Прокимен, глас 7: Возвеселится праведник о Господе / и уповает на Него.
Стих: Услыши, Боже, глас мой, внегда молитимися к Тебе.
Апостол ко Евреем, зачало 326
Аллилуиа, глас 4: Праведник, яко финикс процветет и яко кедр, иже в Ливане, умножится.
Стих: Насаждени в дому Господни во дворех Бога нашего процветут.
Евангелие от Луки, зачало 67.
Причастен: В память вечную:
МОЛИТВА
святому благоверному великому князю Святославу Юрьевскому
О святый угодниче Христов, благоверный княже Святославе! Вемы тя, яко печальника земли Русския, кротостию своею в междоусобных распрех братий умиротворявшего. Странен и пришлец на земли явился еси, многажды бо гоним с престола княжения своего, чужд вражды и ненависти показался еси. Благородствие, богатство, честь и славу якоже суетная презрев, к Богу единому всею душею прилепился еси, и благое иго Христово на ся взем, миролюбием горняго Сиона достигл еси. Не вемы тя мертва быти, но и по смерти ведуще тя жива суща, предстояще пред цельбоносною ракою мощей твоих, сия сердцем и усты лобызаем и тебе зовем:
Призри на люте страждущее Отечество наше, в немже крамолы и нестроения зело умножишася, и умоли Господа Славы да помилует землю Русскую. Пробуди совесть нашу, суетными мудрованиями и страстьми пагубными усыпленную. Просвети сердца наша, гордынею и злопамятством омраченные. Потщися, угодниче Божий, не остави нас во греховном плену быти, да не будем посмеяние диаволу и не умрем в лукавых деяниях наших, даруй нам покаяние люботрудное. Умири вражду на нас имущих, да не погибнут ради нашего окаянства. Буди усердный попечитель о домех наших, призри на слезы отцев и матерей о чадех своих заблудших. Посети в темницах сущих, вдовиц и сирых не остави твоею милостию, и всем людем с верою к тебе притекающим вся к пользе душевной и телесней потребная у Господа испроси, во еже избавитися нам всем в день Судный от страшныя шуия части, стати же одесную со избранными Его в наследие Царствия Небесного, и славити купно с тобою всех благих Подателя, единаго в Троице славимаго Бога, Отца и Сына и Святаго Духа, ныне и присно и во веки веков. Аминь.
Тропарь, глас 5:
Славу земнаго княжения,/ Богомудре Святославе,/ оросил еси незлобием и кротостию,/ тем же и Бог тя прослави,/ чудесы во утешение скорбящим,/ целиши бо с верою притекающих к раце мощей твоих./ Сего ради молим тя: / проси у Христа Господа/ от всяких бед избавление / и стяжание нам Царствия Небеснаго.
Кондак, глас 3
Града Юрьева теплейший заступниче, / земли Владимирския покрове, / Благоверный княже Святославе, / избави нас душетленных страстей / и спаси твоими молитвами.
Величание:
Величаем тя, / святый благоверный княже Святославе, / и чтим святую память твою, / ты бо молиши о нас / Христа Бога нашего.